किलास १२ के रिजल्ट सार्वजनिक
भक्तपुर, १९ माघ
राष्ट्रिय परीक्षा बोर्ड, सानोठिमी परीक्षा नियन्त्रण कार्यालय किलास १२ के परीक्षाफल सार्वजनिक कईले बा । आजु सार्वजनिक कईल रिजल्ट मुताविक छ हजार ९१६ जने ३.६१ से ४, ३८ हजार ४८० जने ३.२१ से ३.६० आ एक लाख ९ हजार ३१२ जने २.८१ से ३.२० जिपिए(स्तरीकृत अङ्क) लिआईल बाडन ।
एहितरे ५२ हजार ४२७ जने २.०१ से २.४०, सात हजार १६४ जने १.६१ से २.०, ३३३ जने १.२१ से १.६०, चार जने ०.८१ से १.२० आ १८ हजार ८८९ जने ० से ०.८० स्तरीकृत अङ्क लियावल बोर्ड के सदस्य सचिव दुर्गा अर्याल जानकारी देहनी ।
परीक्षा मे नियमित ओरी तीन लाख १० हजार ३१६ आ ग्रेडवृद्धि ओरी ९१ हजार ९०० तथा आंशिक ओरी ३१ हजार ५५ करके कुल चार लाख ३३ हजार २७१ जने सहभागी रहलन ।
आंशिक ओरी एक जने के परीक्षा रद्द कईला के साथे कुल ११ हजार ४९० जने के परीक्षा स्थगन कईल बा । आंशिक ओरी २५ हजार २८८ विद्यार्थी उतीर्ण भईल बाडन ।
बोर्ड कोरोना के चलते तोकल वार्षिक तालिका से देरी करके अगहन आ सङ्क्रमित परीक्षार्थी के पुस महिना मे परीक्षा सञ्चालन कईले रहे । किलास ११ के प्राप्ताङ्क ना भईल आ किलास १२ के आन्तरिक मूल्याङ्कन के अङ्क प्राप्त ना भईल परीक्षार्थी के सम्बन्धित विषय के परीक्षाफल स्थगन कईल अर्याल जानकारी देहनी । परीक्षा स्थगन भईल परीक्षार्थी के विवरण बोर्ड के बेबसाइट मे देखल जा सकता ।
बितल वैशाख ८ गते से सञ्चालन होखेवाला किलास १२ के परीक्षा कोभिड–१९ के चलते पूर्णाङ्क घटाके बितल अगहन ९ गते से सञ्चालन कईल रहे । किलास १२ के परीक्षा ४० प्रतिशत पूर्णाङ्क के मात्र रहे ।
बाँकी ६० प्रतिशत मेसे ४० प्रतिशत मूल्याङ्कन किलास ११ के रिजल्ट आ २० प्रतिशत आन्तरिक मूल्याङ्कन के आधार मे कईल बोर्ड जनवले बा ।
