थापाथलीमा फुटेको मेलम्चीको पाइप मर्मत कार्य सम्पन्न

काठमाडौँ, २१ फागुन

काठमाडौँको थापाथली चोक नजिक मङ्गलबार बिहान एका एक फुटेको मेलम्चीको मुख्य पाइपलाईन मर्मतको कार्य आज बिहान मात्रै सम्पन्न भएको छ ।
काठमाडौँ उपत्यका खानेपानी लिमिटेड (केयुकेएल) को प्राविधिक टोलीले फुटेको पाइपलाईन मङ्गलबार दिउँसोदेखि मर्मत कार्य सुरु गरी आज बुधबार बिहान ४ बजे मात्रै मर्मतको काम सम्पन्न गरेको काठमाडौँ उपत्यका खानेपानी लिमिटेड (केयुकेएल) का इञ्जिनियर प्रकाश बरालले जानकारी दिनुभयो ।
उहाँले भन्नुभयो, “पाइप मर्मत र जडानको काम बिहान आज ४ मात्रै काम सकियो । चुहावट परीक्षण गर्न भल्भ र वाशआउट भल्भको व्यवस्था गरिएको छ । उक्त कार्यको सफल परिक्षण पश्चात आजै पानी वितरण पुन: सुचारु गर्नेछौँ ।”
खानेपानीमन्त्री प्रदीप यादवले थापाथलीमा के कारणले मेलम्चीको पाइप लाइन फुटेको हो सो विषयमा पत्ता लगाउन काठमाडौँ उपत्यका खानेपानी लिमिटेड (केयुकेएल) लाई निर्देशन दिनु भएको छ ।
“के कारणले पाइप फुटेको हो । त्यसको एकिन कारण पत्ता लगाउन छानविन गरी अब उपरान्त यस्ता घटना दोहरिन नदिनुहोला,” मन्त्री यादवले भन्नुभयो ।
मङ्गलबार बिहानै उक्त पाइप फुट्दा थापाथली क्षेत्रमा बाढी आएर जलमग्नु हुनुका साथै सडक समेत अवरुद्ध भएको थियो । थापाथली चोकबाट नर्भीक इन्टरनेशनल अस्पताल जाने सडकमा पाइपको लाइन फुट्दा पानी नजिकका मेडिकल, रेष्टुरेन्ट, घर र पसलहरुमा पसेको थियो ।
यसअघि पनि बबरमहल क्षेत्रमा नेपाल प्राधिकरणको काम गर्ने बेलामा खानेपानीको मुख्य पाइप लाइन फुट्दा त्यस क्षेत्रका सरकारी कार्यालयहरू डुबानमा परेका थिए ।