मंत्री बदलेला, बाकी जयसवाल यथावत्, पर्यटन विकास कार्यालय पर्सा में रकम वसूली के आरोप फिर उठल

पर्सा — मधेस प्रदेश सरकार के उद्योग, वाणिज्य आ पर्यटन मन्त्रालय के अधीन रहल पर्यटन विकास कार्यालय पर्सा के कार्यालय प्रमुख बबिता जयसवाल पर अनियमितता आ रकम वसूली के आरोप एक बेर फिर से उठल बा।
स्थानीय स्रोत अनुसार, जवनो मंत्री आवेलन, जयसवाल नजराना बुझा के आपन पद आ प्रभाव कायम रखे के काम करत आइल बाड़ी। पहिले भी कई गो सञ्चारमाध्यम में एह बारे में समाचार आ टीका–टिप्पणी प्रकाशित भइल रहे, बाकिर ओह सब के बावजूद ऊ अबहियों ओही पद पर कायम रहल बाड़ी।
आरोप बा कि बिना कमिसन भुक्तानी देवे से इनकार करे के चलते कई गो उपभोक्ता समिति आ ठेकेदार लोग समस्या में पड़ल बा। जयसवाल के व्यक्तिगत अहंकार आ मनमानी व्यवहार से सेवाग्राही लोग परेशान रहल बतावल जा रहल बा।
एहू आरोप लागल बा कि कार्यालय प्रमुख जयसवाल आपन सगा भाई के करार सेवा में नियुक्त कइले बाड़ी आ ओकरा माध्यम से सेवाग्राही आ ठेकेदार से रकम वसूली करावल जा रहल बा। एह तरह सार्वजनिक कार्यालय के निजी स्वार्थ खातिर इस्तेमाल कइल जा रहल बा, अइसन गम्भीर आरोप भी सामने आइल बा।
उपभोक्ता समिति आ ठेकेदार लोग के कहनाम बा कि कार्यालय से काम सहज बनावे के नाम पर नियमित रूप से पैसा मांगल जाला। ई गुनासो लमहर समय से चल रहल बा। हालांकि, एह मामला पर कार्यालय प्रमुख बबिता जयसवाल के आधिकारिक प्रतिक्रिया अभी तक सार्वजनिक नइखे भइल।