पर्सा जिल्ला निर्वाचन क्षेत्र नं. १ बाट उम्मेदवार अनिल रुङटा भन्छन्– ‘ठगी र धम्कीमा मेरो संलग्नता छैन’

नेपाली कांग्रेस का तर्फबाट पर्सा जिल्ला निर्वाचन क्षेत्र नं. १ मा प्रतिनिधिसभा सदस्यका उम्मेदवार अनिल रुङटाले आफू इमान्दारीपूर्वक रोजीरोटीका लागि काम गर्ने व्यक्ति भएको स्पष्ट पारेका छन्। उनले आफू कुनै पनि प्रकारको ठगी वा धम्की जस्ता गतिविधिमा संलग्न नरहेको दाबी गरेका हुन्।

उम्मेदवार रुङटाले भने, “म आफ्नो रोजीरोटीका लागि इमान्दारीपूर्वक काम गर्छु। मैले कसैलाई ठगेको छैन, कसैलाई धम्क्याएको पनि छैन।” उनले जनतामाझ फैलाइएको भ्रमप्रति संकेत गर्दै आफूविरुद्ध लगाइएका आरोपहरू निराधार रहेको बताए।

उनले केही अन्य उम्मेदवारहरूले भने यही क्षेत्रका व्यापारीहरूलाई धम्क्याएर अनुचित फाइदा उठाएको आरोप लगाए। यस्ता गतिविधिले स्वस्थ राजनीतिक प्रतिस्पर्धालाई कमजोर बनाउने उनको भनाइ छ।

रुङटाले आफू पारदर्शिता र निष्पक्षताको पक्षमा रहेको उल्लेख गर्दै जनताको विश्वास नै आफ्नो सबैभन्दा ठूलो पूँजी भएको बताए। “राजनीतिमा सबैभन्दा ठूलो शक्ति भनेको जनताको विश्वास हो,” उनले भने, “त्यसलाई जोगाउन म प्रतिबद्ध छु।”

आगामी निर्वाचनमा मतदाताले सत्य र इमान्दार उम्मेदवारलाई साथ दिने विश्वास व्यक्त गर्दै उनले स्वच्छ र विकासमुखी राजनीतिका लागि आफू उम्मेदवार बनेको बताए।