बालेन शाह नेपाल के प्रधान मंत्री बनल

परिचय दासप्रोफेसर आ पूर्व अध्यक्ष,नव नालंदा महाविहार सम विश्वविद्यालय ( संस्कृति मंत्रालय , भारत सरकार)नालंदा~803111( बिहार, भारत ) मोबाइल ~ 91~9968269237

बालेन शाह के नाम अब नेपाल के शहरी राजनीति से निकल के राष्ट्रीय सत्ता के गलियारा में गूंजे लागल बा। बालेन शाह जवन काठमांडू के मेयर बन के एगो नई किसिम के राजनीति के संकेत देले रहलें, अगर उ देश के प्रधानमंत्री बन जासँ, त ई घटना खाली सत्ता परिवर्तन ना होई, बलुक नेपाल के राजनीतिक चेतना में एगो गहिरा मोड़ के रूप में देखल जाई। एह संभावना के भीतर लोकतंत्र के नयापन, युवा ऊर्जा आ परंपरागत राजनीति से मोहभंग—तीनु चीज एक साथ समाइल बा।

नेपाल के राजनीति लमहर समय से परंपरागत दलन के हाथ में रहल बा। उहां के जनता कई बेर अस्थिरता, सरकार बदल आ विचारधारा के नाम पर खींचतान देख चुकल बा। एह बीच बालेन शाह जइसन चेहरा, जवन ना त परंपरागत दल से गहिरा जुड़ल रहल, ना ही पुरान सत्ता ढांचा के हिस्सा, जनता खातिर एगो “विकल्प” के रूप में उभरल। अगर ई विकल्प प्रधानमंत्री पद तक पहुंचेला त ई संकेत होई कि नेपाल के जनता अब पारंपरिक राजनीतिक ढांचा से बाहर निकल के सोच रहल बिया।

बालेन शाह के राजनीति के आधार शहरी प्रशासन, पारदर्शिता आ युवा भागीदारी पर टिकले बा। उ काठमांडू में जवन प्रयोग कइले—जइसे अवैध निर्माण पर कार्रवाई, प्रशासनिक सख्ती, आ सोशल मीडिया के माध्यम से जनता से सीधा संवाद—उ सब संकेत देला कि उ सत्ता के एक अलग शैली लेके आवे के कोशिश करत बाड़न। प्रधानमंत्री बनल के बाद ई शैली राष्ट्रीय स्तर पर लागू हो सकेला, जवन नेपाल के प्रशासनिक संस्कृति में बदलाव ला सकेला।

अब सवाल उठेला कि एह बदलाव के भारत-नेपाल संबंध पर का असर पड़ी। भारत आ नेपाल के संबंध इतिहास, संस्कृति, धर्म आ भौगोलिक निकटता से गहराई से जुड़ल बा। ई दुनो देश के बीच “रोटी-बेटी” के रिश्ता कहल जाला। लेकिन राजनीति के स्तर पर कई बेर तनाव, संदेह आ दूरी भी देखे के मिलल बा। खासकर जब नेपाल में राष्ट्रवाद के नाम पर भारत के खिलाफ भावना उभरल, तब संबंध में ठंडापन आ गइल।

अगर बालेन शाह प्रधानमंत्री बनेलन, त सबसे पहिले देखे के बात होई कि उ भारत के प्रति कइसन दृष्टिकोण अपनावेलन। काहे कि उ परंपरागत दलन के हिस्सा ना रहलें, एह से उ परंपरागत विदेश नीति के ढांचा से भी अलग सोच सकेलें। उ युवा बाड़न, तकनीक के समझ रखेलन, आ वैश्विक परिप्रेक्ष्य में सोच सकत बाड़न—एह से संभव बा कि भारत-नेपाल संबंध में एगो व्यावहारिक आ आधुनिक दृष्टिकोण सामने आवे।

भारत खातिर नेपाल सिर्फ पड़ोसी देश ना ह, बलुक रणनीतिक रूप से बहुत महत्वपूर्ण बा। चीन के बढ़त प्रभाव के बीच नेपाल के भूमिका अउर महत्वपूर्ण हो गइल बा। एही कारण बा कि भारत हमेशा नेपाल में स्थिर आ मित्रवत सरकार चाहेले। अगर बालेन शाह के नेतृत्व में सरकार बनेला त भारत के नीति निर्माता लोग सावधानी से देखी कि उ चीन आ भारत के बीच संतुलन कइसे बनावेलन।

बालेन शाह के अब तक के छवि देखल जाव, त उ “एंटी-एस्टैब्लिशमेंट” राजनीति के प्रतिनिधि मानल जात बाड़न। एह से संभावना बा कि उ नेपाल के संप्रभुता के मुद्दा पर जोर देसँ। ई बात भारत खातिर थोड़ा चुनौतीपूर्ण हो सकेला, काहे कि कई बेर नेपाल में “स्वतंत्र विदेश नीति” के नाम पर भारत से दूरी बनावे के कोशिश कइल जाला। लेकिन अगर एह स्वतंत्रता के भावना के संतुलन आ समझदारी से इस्तेमाल कइल जाई, त ई संबंध के और परिपक्व बना सकेला।

भारत-नेपाल के आर्थिक संबंध पर भी बालेन शाह के नेतृत्व के असर पड़ी। भारत नेपाल के सबसे बड़ा व्यापारिक साझेदार बा। बिजली, सड़क, रेलवे, आ जल संसाधन के क्षेत्र में कई परियोजना चल रहल बा। अगर बालेन शाह प्रशासनिक पारदर्शिता आ कार्यक्षमता बढ़ावेलन त ई परियोजना तेज हो सकेला। निवेश के माहौल सुधर सकेला आ भारत के कंपनियन खातिर नेपाल में काम करे के सुविधा बढ़ सकेली।

दूसरी ओर, अगर उ राष्ट्रवाद के नाम पर विदेशी निवेश पर कड़ाई बढ़ावेलन, त ई परियोजना में देरी भी हो सकेला। एह से उनका नीति के संतुलन बहुत महत्वपूर्ण होई। भारत के साथ सहयोग बनावल आ साथे-साथ राष्ट्रीय हित के रक्षा कइल—ई दुनो के बीच संतुलन साधल आसान काम ना होई।

सांस्कृतिक स्तर पर भारत-नेपाल के संबंध बहुत गहिरा बा। राम, सीता, जनकपुर, अयोध्या—ई सब साझा धरोहर बा। एह संबंध में राजनीति के बदलाव से बहुत अधिक फर्क ना पड़े, लेकिन माहौल जरूर प्रभावित हो सकेला। अगर राजनीतिक नेतृत्व सकारात्मक संकेत देला त सांस्कृतिक संबंध और मजबूत हो सकेला। लेकिन अगर बयानबाजी में कटुता आ जाव, त जनता के स्तर पर भी दूरी बढ़ सकेली।

बालेन शाह के युवा छवि भारत के युवा वर्ग के साथ एक नया जुड़ाव भी पैदा कर सकेली। सोशल मीडिया के दौर में नेता लोग के छवि सीमित ना रह जाला। अगर उ आधुनिक, पारदर्शी, आ विकास केंद्रित छवि बनावेलन, त भारत में भी उनका प्रति सकारात्मक धारणा बन सकेली। ई “सॉफ्ट पावर” के स्तर पर संबंध के मजबूत कर सकेला।

नेपाल के आंतरिक राजनीति पर भी एह बदलाव के असर गहिरा होई। परंपरागत दलन के वर्चस्व टूटे लागी, आ नई राजनीति के रास्ता खुले लागी। अगर ई प्रयोग सफल होला, त दक्षिण एशिया के अउर देशन में भी युवा नेतृत्व के उभार के प्रेरणा मिल सकेला। लेकिन अगर ई प्रयोग असफल होला त लोग के विश्वास फिर से परंपरागत ढांचा की ओर लौट सकेला।

भारत के नीति निर्माता लोग खातिर ई स्थिति “इंतजार आ अवलोकन” वाली होई। उ लोग जल्दी प्रतिक्रिया ना देके धीरे-धीरे बालेन शाह के नीति आ रुख के समझे के कोशिश करी। कूटनीति में जल्दबाजी नुकसानदेह हो सकेला। एह से भारत संभवतः शुरुआती दौर में संतुलित आ संयमित प्रतिक्रिया देई।

नेपाल के जनता के अपेक्षा भी बहुत बढ़ जाई। बालेन शाह जइसन नेता से लोग बदलाव के उम्मीद रखी। भ्रष्टाचार कम होखे, प्रशासन तेज होखे आ रोजगार के अवसर बढ़े—ई सब अपेक्षा सामने आई। अगर उ एह अपेक्षा पर खरा उतर जालन त उनका नेतृत्व मजबूत होई। लेकिन अगर उ असफल रहलन त निराशा भी तेजी से फैल सकेली।

भारत-नेपाल सीमा के खुलापन दुनो देश के संबंध के सबसे खास पहलू बा। लोग बिना वीजा के आवागमन कर सकेला। रोजगार, शिक्षा आ व्यापार के अवसर साझा बा। अगर राजनीतिक संबंध मजबूत रहेला त ई व्यवस्था जारी रही। लेकिन अगर तनाव बढ़ेला त एह पर भी असर पड़ सकेला। एह से स्थिरता बहुत जरूरी बा।

बालेन शाह के प्रधानमंत्री बनल एक तरह से “राजनीतिक प्रयोग” होई। एह प्रयोग के सफलता या असफलता पर नेपाल के भविष्य निर्भर करी। भारत खातिर ई जरूरी होई कि उ एह बदलाव के खतरा ना समझे, बलुक अवसर के रूप में देखे। नया नेतृत्व के साथ नया संवाद, नई समझ आ नई साझेदारी विकसित कइल जा सकेला।
अंत में, ई कहा जा सकेला कि बालेन शाह के प्रधानमंत्री बनल केवल व्यक्ति के उभार ना ह, बलुक एक युग परिवर्तन के संकेत हो सकेला। नेपाल में लोकतंत्र के नई दिशा, युवा नेतृत्व के उभार आ पारंपरिक राजनीति के पुनर्मूल्यांकन—ई सब एक साथ घटित हो सकेला। भारत-नेपाल संबंध पर एह के असर मिश्रित हो सकेला—कहीं अवसर, कहीं चुनौती।

हर बदलाव में एक संभावना छिपल रहेला। अगर दुनो देश समझदारी, धैर्य, आ पारस्परिक सम्मान के साथ आगे बढ़ेला त ई बदलाव संबंध के और मजबूत बना सकेला। राजनीति के लहर चाहे जइसन होखे, इतिहास आ संस्कृति के गहराई अक्सर अंत में संतुलन बना ही लेती