Web Surfer Internet को कलैयामा ठगी धन्धा? ग्राहक सेवा र प्राविधिक व्यवस्थापनमाथि प्रश्न

कलैया ६ भदौ 

बारा जिल्लाको कलैयामा Web Surfer Internet को इन्टरनेट सेवा सञ्चालन तथा ग्राहक सेवामाथि उपभोक्ताले गम्भीर प्रश्न उठाउन थालेका छन्। इन्टरनेट सेवा अवरुद्ध हुँदा समयमा मर्मत नगरिदिने, प्राविधिकसँग सम्पर्क गर्न कठिन हुने तथा समस्या समाधानका लागि ग्राहकले पटक–पटक फोन गर्नुपर्ने अवस्था रहेको गुनासो गरिएको छ।

कलैयामा इन्टरनेट सेवा लिएका केही ग्राहकका अनुसार सेवा अवरुद्ध भएपछि सम्बन्धित प्राविधिकलाई फोन गर्दा लामो समयसम्म सम्पर्क हुन नसक्ने गरेको छ। पछिल्लो घटनामा कलैयामा रहेका भनिएका प्राविधिकको मोबाइल नम्बरमा दिनभरि पटक–पटक फोन गर्दा समेत फोन नलागेको तथा सेवा अवरुद्ध भएको समस्या समयमा समाधान नभएको गुनासो आएको छ।

यस विषयमा Web Surfer Internet को केन्द्रीय कार्यालयमा सम्पर्क गर्दा ‘हामी reseller गर्दैनौँ’ भन्ने जवाफ दिइएको बताइएको छ। तर, कलैयामा कम्पनीको नामबाट इन्टरनेट सेवा तथा प्राविधिक सेवा उपलब्ध भइरहेको अवस्थामा स्थानीय स्तरमा सेवा कसरी सञ्चालन भइरहेको छ भन्ने विषयमा समेत ग्राहकले स्पष्टता मागेका छन्।

ग्राहकहरूको मुख्य गुनासो भनेको इन्टरनेट शुल्क नियमित रूपमा तिर्नुपर्ने तर सेवा अवरुद्ध हुँदा समयमा प्राविधिक सहयोग नपाउनु हो। इन्टरनेटमा समस्या आएपछि कामकाज प्रभावित हुने गरेको भन्दै उपभोक्ताले कम्पनीले प्रभावकारी ग्राहक सेवा र तत्काल प्राविधिक सहयोगको व्यवस्था गर्नुपर्ने माग गरेका छन्।

स्थानीय उपभोक्ताहरूले कम्पनीको केन्द्रीय कार्यालय र कलैयामा सेवा उपलब्ध गराउने पक्षबीचको सम्बन्ध, सेवा सञ्चालनको आधिकारिकता, ग्राहकबाट लिइने शुल्क तथा प्राविधिक व्यवस्थापनबारे स्पष्ट जानकारी सार्वजनिक गर्न माग गरेका छन्।