निशा कुमारी के हत्या कईल आरोप, आरोपित के पकडेमे पुलीस आनाकानी कर रहल

वीरगंज ०४ बैशाख

पर्सा जिल्ला के सखुवा प्रसौनी गाँवपालिका वार्ड नम्बर २ जमुनिया के चन्द्रावती देवी के छोट बेटी नीशा कुमारी गोढ के उनकर मरद सहित पिटपाट करके मारल आरोप माइती पक्ष लगवले बा । घटना मे संलग्न के पकडके कारबाही के माग करत बितल शनिचर के दिने जिल्ला प्रहरी कार्यालय पर्सा मे माइती पक्ष जोहेरी भी देहले बा । माकिर, पुलीस उलोग के अभी तक भी ना पकडला के बाद माइती पक्ष मंगर के दिने वीरगंज मे पत्रकार सम्मेलन करके पुलीस उपर आपन आक्रोश जनवले बाडन ।
जमुनिया के हिरा साह गोढ के छोट बेटी नीशा के चार बरीस पहिले पर्सा के बहुदरमाइ नगरपालिका वार्ड नम्बर ३ नगरदाहा के स्व. सिंघासन साह गोढ के बेटा मुन्ना कहेवाला इनरजीत साह गोढ से हिन्दु परम्परा मुताविक मागी वियाह भईल रहे ।
वियाह के चार बरीस ना बितत निशा के उनकर मरद मुन्ना आ उनकर परिवार के सदस्य मिलके बितल शनिचर के दिने निर्घात पिटपाट करके हत्या कईल पत्रकार सम्मेलन मे निशा के माई चन्द्रावती देवी आरोप लगवनी । उ कहनी, ‘वियाह भईला १ बरीस एने से हि दामाद आ उनकर परिवार निशा के पिटपाट करत यातना देत आईल रहलन । दामाद दोसर लईकी के सँगे लागल रहलन । उहे चलते छुटकारा पावे खातिर शनिचर के दिने हमर बेटी के उलोग पिटके मुआ देलन ।’
माई चन्द्रावती के मुताविक, निशा तीन महिना के गर्भवती रहली । स्वास्थ्य संस्था मे जाके चेकजाँच करावे खातिर निशा आपन मरद मुन्ना के कहला पर पईसा नईखे कहके बहाना बनाके उलटे यतना देहल दुःख बितल शनिचर के सबेरे ७ बजे फुन करके माई चन्द्रावती के सुनवले रहली ।
उहे दिन सबेरे साढे ११ बजे ओरी नारायणी अस्पताल से एक आफन्त निशा के भाइ राजकुमार के फुन करके निशा अस्पताल मे भर्ना रहल खरब सुनवलें । उ खबर मिलला के बाद निशाा के भईया राजकपुर अस्पताल मे पुगला पर बहिन मरल अवस्था मे रहली । उनकर मुह आ बाँह आ पेट ओरी पिटल करिया चिन्हा रहे राजकपुर पत्रकार सम्मेलन मे कहलन ।
अस्पताल मे बहिन निशा के पोष्टमार्टम के बाद लास उनकर मरद मुन्ना सहित के परिवार बुझके उहे दिने जलदी जलदी मे दाहसंस्कार कईल राजकपुर बतवलन ।
निशा के हत्या मे संलग्न उनकर मरद मुन्ना आ बाबा मान्सी साह गोढ विरुद्ध बितल शनिचर के दिने जिल्ला प्रहरी कार्यालय मे जाहेरी देहल बाबु हिरा बतवनी । ‘माकिर हमर बेटी के मारेवाला के पुलीस अभी भी पकडले नईखे । उलोग घरमे बाडन । खुलेयाम घुम रहल बाडन । ई देखला पर आउर दुःख थपाईल बा’ हिरा बतवनी ।
चार बरीस पहिले नगद आठ लाख आ मोटरसाइकल लगायतका सरसामान दहेज मे देके धुमधाम के साथ वियाह करके पठावल बेटी के अभी अकाल मे ज्यान गईला पर मन रोवता कहके बतवनी ।
एने जिल्ला प्रहरी कार्यालय पर्सा के प्रवक्ता प्रहरी नायब उपरीक्षक कुमार विक्रम थापा पोष्टमार्ट के रिपोर्ट अईला के बाद उहे मुताविक घटना के सम्बन्ध मे पुलीस अगाडि बढेके बतवनी । उ, ‘लास के अवस्था देखला पर देह मे चोटपटक लागल, घाव भा ओईसन कुछो ना देखल गईल । पोष्टमार्ट के रिपोर्ट अईला के बाद मात्र मृत्यु के यकिन कारण खुली । उहे चलते पुलीस पोष्टमार्टम के रिपोर्ट ईन्तजार मे बा । रिपोर्ट आवेमे अभी हप्ता दश दिन तक लाग सकता’ कहके बतवनी ।