प्रथम अन्तर्राष्ट्रिय मातृभाषा पत्रकारिता सम्मेलन मे पर्सेली पत्रकारलोग सम्मानित

वीरगंज २० जेठ

प्रथम अन्तर्राष्ट्रिय मातृभाषा पत्रकारिता सम्मेलन एतवार के दिने बितल बा । नेवाः पत्रकार राष्ट्रिय दबू सार्क जर्नालिष्ट फोरम आ नेपाल आदिवासी जनजाति पत्रकार महासंघ (फोनिज) के सहकार्य मे दु दिने भक्तपुर थिमी ब्यान्कट होटल मे भईल कार्जक्रम के समापन समारोह के सम्बोधन करत नेपाल सरकार के उपप्रधान तथा परराष्ट्र मन्त्री नारायणकाजी श्रेष्ठ मातृभाषा आपन जगहा के भाषा मे समाचार प्रसारण तथा सम्प्रेषण करके मातृभाषा के संरक्षण करेके बात मे जोड देहनी ।
मातृभाषा पत्रकारिता से अनेकन जातजाति के भाषा आ संस्कृति के संरक्षण एवं सम्बद्र्धन मे भी योगदान पुगाई’ मन्त्री श्रेष्ठ कहनी । मातृभाषा मे समाचार लिखेवाला पत्रकारलोग मे स्थानीय परिस्थिति के बारे मे बढिया से जानकारी होखेवाला भईला से एकरा से पाठक आ स्रोता के खातिर उपयोगी होखेके बतवनी ।
उ कार्जक्रम मे सार्क जर्नालिष्ट फोरम मे आबद्ध रहल भारत, बंगलादेश लगायत से मात्रृभाषि पत्रकारलोग के सहभागिता रहल सार्क जर्नालिष्ट फोरम के अन्तराष्ट्रिय अध्यक्ष राजु लामा जानकारी देहनी ।
प्रथम अन्तर्राष्ट्रिय मातृभाषा पत्रकारिता सम्मेलन मे पर्सा जिल्ला से महम्मद सदाब, दिपेन्द्र प्रजापति, प्रहार डेली अनलाइन न्युज पोर्टल के सम्पादक राहुल कुमार गुप्ता, अनलाइन न्युज दैनिक के अजय कुमार साह, सौर्य दैनिक के पर्सा संम्वाददाता पवन प्रसाद साह के प्रमाण पत्र, माया के चिन्ह, प्रेस ज्याकेट से सम्मान कईल रहे ।
नेवाःपत्रकार राष्ट्रिय दबू के अध्यक्ष नृपेन्दरलाल श्रेष्ठ के अध्यक्षता मे भईल कार्जक्रम मे विशिष्ट अतिथी सार्क जर्नालिष्ट फोरम के अन्तराष्ट्रिय अध्यक्ष राजु लामा, सचिव अब्दुल रहमान, सदस्य सुधानसु अनुरुध लगायत के सहभागिता रहल रहे ।