‘मुसहर समुदाय स्वास्थ्य सेवा से बन्चित’

वीरगंज १६ जेठ

वीरगंज महानगरपालिका के अनेकन वार्ड मे रहत आईल मुसहर समुदाय स्वास्थ्य सेवा से बन्चित रहल एक अध्ययन बतवले बा । बुध के दिने पुरा भईल मानव केन्द्रीत ढाँचा तथा द्रुत लेखाजोखा सम्बन्धी सहश्रृजना कार्यशाला के समापन समारोह मे सार्वजनिक कईल तथ्यांक से अईसन देखवले बा ।
युनिसेफ के सहजोग मे वीरगंज महानगरपालिका के स्वास्थ्य महाशाखा महानगर के वार्ड नम्बर २२, २८ आ ३२ के १ सय ७४ मुसहर घरधुरी मे कईल स्थलगत सर्भे से ई समुदाय अभी भी तुलनात्मक रुप मे आउर समुदाय से स्वास्थ्य सेवा सुविधा के पहुँच से दुर रहल मिलल बा ।
कार्जक्रम मे युनिसेफ नेपाल प्रतिनिधि एवम् सामाजिक व्यवहार परिवर्तन सम्बन्धी विज्ञ लिला खनाल सर्भे से ई वार्ड के मुसहर समुदाय मे औसत वियाह उमिर १७ दशमलव २ प्रतिशत, बच्चा जन्मावेवाला औसत उमिर १९ बरीस रहल देखावल बतवनी । समुदाय मे बालवियाह दर ८० प्रतिशत, किशोरी गर्भवती दर ५१ प्रतिशत, संस्थागत सुत्केरी होखेवाला दर ५५ प्रतिशत आ घर मे खोपकार्ड ना मिलल दर ४८ प्रतिशत रहल बा ।
कार्जक्रम के सम्बोधन करत वीरगंज महानगरपालिका के मेयर राजेशमान सिंह मुसहर समुदाय के स्तरोन्नति के खातिर स्वास्थ्य मात्र ना होके शिक्षा के क्षेत्र मे भी लगानी करे खातिर निहोरा कईनी ।
मुसहर समुदाय के लईकालईकी तथा युवालोग के खेलकुद क्षेत्र से जोडके शिक्षा ओरी आकर्षित करे सकेके सुझाव भी देहनी । सिंह बदलाव सम्भव रहला पर भी ओकरा खातिर सरोकारवाला सभी के साथ आ सहकार्य जरुरी रहल बतवनी ।
स्वास्थ्य कार्यालय पर्सा के प्रमुख मुक्तिनारायण साह मुसहर समुदाय के उन्नयन के खातिर तीन तह के सराकार के सहकार्य जरुरी रहल बतवनी । उ शिक्षा आ स्वास्थ्य क्षेत्र मे सुधार से ई समुदाय के स्तर उठेके बतवनी ।
कार्जक्रम मे मुसहर समुदाय के स्तरोन्नति के खातिर नीतिगत सुझाव भी देहल गईल रहे । जउना मे ई समुदाय के निःशुल्क स्वास्थ्य बीमा, जन्मदर्ता, नागरिकता आ लालपुर्जा के सुनिश्चितता, सर्वसुलभ स्वास्थ्य सेवा पहुँच के खातिर निजी अस्पतालसब से समन्वय आ सहकार्य करेके, निःशुल्क एम्बुलेन्स सेवा, सिपटी, पिएवाला पानी आ नाला के व्यवस्था करेके आदि रहल बा ।