रौतहट मे १८ लाख नक्कली रोपेया सहित युवक पकडईलें

रौतहट १९ पुस

रौतहट पुलीस १८ लाख रोपेया से बेसी नेपाली नक्कली रोपेया सहित एक युवक के पकडले बा । पुलीस गुजरा नगरपालिका–५ हरिहरपुर के २५ बरीस के सन्दीप यादव के देवाही गोनाही नगरपालिका–८ पटेल चोक से १८ लाख ४३ हजार रोपेया के नक्कली नोट सहित पकडले बा ।

जयसवाल के पुलीस बियफे के दिने पत्रकार सम्मेलन करत सार्वजनिक कईले बा । जिल्ला प्रहरी प्रमुख एसपी महेन्द्र श्रेष्ठ नक्कली नोट के गिरोह सक्रिय बा कहके पूर्वसूचना के आधार मे चेकजाँच कईला पर जयसवाल नक्कली नोट सहित पकडाईल जानकारी देहनी ।

‘जिल्ला मे नक्कली नोट के गिरोह सक्रिय बा कहके पहिले हि सुचना मिलल रहे । रातभर सर्च अप्रेसन कईला के बाद पकडेमे सफल भईल बानी,‘ कहत उ ‘नक्कली नोट कहाँ से लियावल कहके खुलेके बाँकी बा ।’

एसपी श्रेष्ठ के मुताविक रात मे पटेल चोक मे सवारी चेकजाँच के समय मे यादव के साथ से पुलीस १ हजार ८ सय ४३ थान १ हजार के नक्कली रोपेया बरामद कईले रहे । कुछ महिना से जिल्ला के अनेकन बजारसब मे नक्कली नोट बरामद होखे लागला के बाद पुलीस निगरानी बढवले रहे । नक्कली रोपेया सहित पकडाईल यादव के मुद्रा सम्बन्धी कसुर अन्तर्गत अनुसन्धान तथा कारवाही अगाडि बढावल गईल जिल्ला प्रहरी प्रवक्ता डिएसपी एलिजा गिरी जानकारी देहनी ।

उनका मुताविक यादव के साथ से अनेकन बैंक के ५ थान एटिएम कार्ड आ १६ लाख ६५ हजार उल्लेख भईल चेक भी बरामद भईल बा । एकरा से पहिले पुलीस टोली गरुडा नगरपालिका के शिवनगरस्थित मेला से भारतीय रोपेया सहित चार जने, गरुडा नगरपालिका–४ से १ हजार दर के ७ थान नक्कली रोपेया सहित ३ जने आ बालचनपुर से १ हजार दर के २० थान नक्कली रोपेया सहित १ जने के पकडले रहे ।