विष्णुपुर–७ मा एचपीभी खोप अभियान: कक्षा ६ का १०–१४ वर्षीया बालिकालाई निःशुल्क खोप

विष्णुपुर (सप्तरी)

मधेस प्रदेश  सप्तरी जिल्लाको विष्णुपुर गाउँपालिका वडा नं–७ स्थित स्वास्थ्य चौकीको आयोजनामा एचपीभी (HPV) खोप सम्बन्धी अभियान तथा अभिमुखीकरण बैठक सम्पन्न भएको छ। कार्यक्रममा वडा स्तरीय खोप समन्वय समितिका अध्यक्ष तथा वडा नं–७ का वडा अध्यक्ष लोचन साहको अध्यक्षता रहेको थियो।
व्यापक सहभागितासहित अभिमुखीकरण
बैठकमा सहजकर्ताका रूपमा वडा नं–७ का स्वास्थ्य चौकी अधिकृत ललित कुमार साह (सि.अ.हे.व.) उपस्थित थिए। साथै समन्वय समिति पदाधिकारीहरू—वडा सदस्य विष्णु मण्डल, गंगाई मण्डल, स्वास्थ्य संस्थामा कार्यरत सम्पूर्ण कर्मचारी, जनता माध्यमिक विद्यालयका प्रधानाध्यापक कुशेश्वर मण्डल, जनता आधारभूत विद्यालयका प्रधानाध्यापक रुपकान्त मिश्र लगायत वडाका विभिन्न राजनीतिककर्मीहरूको उल्लेखनीय उपस्थिति रहेको थियो।
दुई विद्यालयमा खोप केन्द्र सञ्चालन
स्वास्थ्य चौकी अधिकृत ललित कुमार साहका अनुसार एचपीभी खोप अभियान वडा नं–७ का दुई विद्यालयमा सञ्चालन गरिनेछ—
जनता माध्यमिक विद्यालय, इटहरी विष्णुपुर हाट्टी बिहान १०:०० बजे देखि १२:३० बजे सम्म
जनता आधारभूत विद्यालय, विष्णुपुर कट्टी
दिउँसो १:०० बजे देखि ४:३० बजे सम्म
उक्त खोप अभियान २०८२ साल माघ २९ गतेदेखि फाल्गुन ०१ गतेसम्म निरन्तर सञ्चालन हुनेछ।
लक्षित समूह: विद्यालय तथा विद्यालयबाहिरका बालिका
अभियान अन्तर्गत विद्यालयको कक्षा ६ मा अध्ययनरत १० वर्षदेखि १४ वर्षसम्मका बालिका तथा विद्यालय बाहिर रहेका सोही उमेर समूहका बालिकाहरूलाई निःशुल्क एचपीभी खोप लगाइने जानकारी दिइएको छ।
विश्व स्वास्थ्य संगठनबाट मान्यता प्राप्त सुरक्षित खोप
स्वास्थ्य अधिकृत साहले एचपीभी खोप विश्व स्वास्थ्य संगठन (WHO) बाट मान्यता प्राप्त सुरक्षित खोप भएको र यसको गम्भीर साइड इफेक्ट नभएको स्पष्ट पार्दै अभिभावक तथा सरोकारवालालाई निर्धक्क भई आफ्ना छोरीहरूलाई खोप लगाउन आग्रह गर्नुभयो।
उहाँले एचपीभी खोपले भविष्यमा हुने पाठेघरको मुखको क्यान्सर जस्ता गम्भीर रोगबाट बचाउन महत्वपूर्ण भूमिका खेल्ने बताउनुभयो।
समुदायमा सचेतना र सहभागिताको अपिल
कार्यक्रममा वक्ताहरूले खोप अभियान सफल बनाउन अभिभावक, शिक्षक, राजनीतिक दलका प्रतिनिधि तथा समुदायका सबै सरोकारवालालाई सक्रिय भूमिका निर्वाह गर्न अपिल गरेका छन्।
वडा नं–७ ले “स्वस्थ बालिका, सुरक्षित भविष्य” भन्ने मूल सन्देशका साथ अभियानलाई प्रभावकारी रूपमा सञ्चालन गर्ने प्रतिबद्धता व्यक्त गरेको छ।