यादवको भव्य घरदैलो, सूर्य चिन्हमा मतदान गर्न अपिल

वीरगञ्ज, १६ फागुन

प्रदीप यादव, नेकपा (एमाले) का तर्फबाट पर्सा निर्वाचन क्षेत्र नम्बर–१ का प्रतिनिधिसभा सदस्य उम्मेदवार, ले वीरगञ्ज महानगरपालिका–३० अन्तर्गत लालपर्सा र प्रसोतीपुर क्षेत्रमा भव्य घरदैलो तथा जनता दर्शन कार्यक्रम सम्पन्न गरेका छन्।
शनिबार बिहान सम्पन्न कार्यक्रममा सयौँ स्थानीयको सहभागिता रहेको थियो। मतदाताले यादवलाई फूलमाला र गम्छा ओढाएर स्वागत गरेका थिए। पूर्व मन्त्रीसमेत रहेका यादवले मतदातासँग संवाद गर्दै विगतका दुई कार्यकालमा आफूले गरेको विकासको मूल्याङ्कन गरेर मतदान गर्न आग्रह गरे।
“१० वर्षअघि पर्सा–१ को अवस्था सम्झनुहोस्, आजको परिवर्तन आफैँ देख्न सक्नुहुन्छ,” उनले भने। आफू क्षेत्रका हरेक टोल र समस्यासँग परिचित रहेको दाबी गर्दै उनले अन्य प्रतिस्पर्धीलाई चुनावी मौसमका उम्मेदवारको संज्ञा दिए।
एमालेको राष्ट्रियता सुदृढीकरण, आर्थिक समृद्धि र समाजवाद उन्मुख विकासको एजेन्डालाई आफ्नो प्रतिबद्धता बताउँदै यादवले गरिबी निवारण, रोजगारी सिर्जना, महिला सशक्तीकरण, कृषि–पर्यटन प्रवर्द्धन तथा स्थानीय उद्योग स्थापना जस्ता कार्यक्रम अघि सारे। उनले सूर्य चुनाव चिन्हमा मतदान गरी एमाले उम्मेदवारलाई विजयी गराउन अपिल गरे।
कार्यक्रममा एमालेका केन्द्रीय तथा स्थानीय नेता, कार्यकर्ता, युवा, महिला र ज्येष्ठ नागरिकको उल्लेख्य उपस्थिति रहेको थियो।