विष्णुपुर न्यायिक समिति कार्यालयमा चोरी गर्ने आरोपमा तीन जना पक्राउ, घरबाटै बरामद भए चोरीका सामग्री

सप्तरी १५ कार्तिक 

सप्तरीको विष्णुपुर गाउँपालिकास्थित न्यायिक समिति कार्यालयको ताल्चा तोडेर विभिन्न सरकारी सामग्री चोरी गरेको आरोपमा प्रहरीले तीन जनालाई पक्राउ गरेको छ। प्रहरीले पक्राउ परेका व्यक्तिहरूको घर तथा सामग्री लुकाएर राखिएको स्थानबाट चोरी भएका विभिन्न सामानसमेत बरामद गरेको जनाएको छ।

गत शुक्रबार राति न्यायिक समिति कार्यालयको ढोकाको ताल्चा तोडेर भित्र प्रवेश गरेका व्यक्तिहरूले ल्यापटप, डेस्कटप कम्प्युटर, पंखालगायतका सामग्री चोरी गरेका थिए। कार्यालयबाट एक थान ल्यापटप, एक थान डेस्कटप कम्प्युटर, तीन थान पंखा, एक थान एडजस्ट फ्यान, दुई थान कुर्सी, एक थान हिटर, एक थान पञ्चिङ मेसिन र एक थान डिजिटल तौल मेसिन चोरी भएको थियो।

घटनाबारे जानकारी प्राप्त हुनासाथ विष्णुपुर इलाका प्रहरी कार्यालयले अनुसन्धान अघि बढाएको थियो। प्रहरी सहायक निरीक्षक (प्र.स.नि.) रामनरेश कुसवाहाको नेतृत्वमा खटिएको प्रहरी टोलीले अनुसन्धानका क्रममा विष्णुपुर गाउँपालिका–७ निवासी तीन जनालाई पक्राउ गरेको हो।

पक्राउ पर्नेमा सुविलाल यादवका छोरा प्रमेश्वर यादव, सुशील राम मास्टरका छोरा रविनकुमार राम र महिन्द्र साहका छोरा विक्की साह रहेका छन्।

प्रहरी सहायक निरीक्षक कुसवाहाका अनुसार चोरी भएका सामग्रीमध्ये ल्यापटपबाहेक अन्य सामग्री आरोपितहरूको घर तथा लुकाइएका स्थानबाट बरामद गरिएको छ। प्रमेश्वर यादवको घरबाट दुई थान कुर्सी, एक थान एडजस्ट फ्यान र एक थान हिटर बरामद गरिएको छ। त्यसैगरी, छिमेकीको घरमा लुकाएर राखिएको पंखासमेत प्रहरीले फेला पारेको जनाएको छ। रविनकुमार रामको घरबाट डेस्कटप कम्प्युटर सेट बरामद गरिएको प्रहरीले जनाएको छ।

चोरी भएको ल्यापटप तथा अन्य बाँकी सामग्रीको खोजी गर्नुका साथै घटनाबारे थप अनुसन्धान भइरहेको प्रहरीले जनाएको छ।

सार्वजनिक कार्यालय नै असुरक्षित, सुरक्षा व्यवस्थामाथि प्रश्न

नागरिकका विवाद समाधान गर्ने तथा न्यायिक प्रक्रियासँग सम्बन्धित महत्त्वपूर्ण कागजात र अभिलेख राखिने न्यायिक समिति कार्यालयमै ताल्चा तोडेर चोरी हुनु स्थानीय तहको सुरक्षा व्यवस्थामाथि प्रश्न उठाउने घटना बनेको छ।

स्थानीयका अनुसार यसअघि पनि गाउँपालिका कार्यालय परिसरबाहिर जडान गरिएका तार तथा बल्ब काटेर चोरी गर्ने र गाउँपालिकासँगै जोडिएको श्री जनता आधारभूत विद्यालयका झ्यालढोका तोडफोड गरी सामान चोरी गर्ने घटना हुँदै आएका छन्।

सार्वजनिक संस्थामा पटक–पटक चोरी तथा तोडफोडका घटना दोहोरिँदा पनि प्रभावकारी सुरक्षा व्यवस्था कायम हुन नसकेको भन्दै स्थानीयस्तरमा चिन्ता व्यक्त गरिएको छ।

विष्णुपुर गाउँपालिका वडा नं. ७ का अध्यक्ष लोचन साहले गाउँपालिका तथा आसपासका सार्वजनिक संस्थामा पटक–पटक चोरी र तोडफोडका घटना भइरहनु गम्भीर विषय भएको बताएका छन्। उनले पालिकाको सुरक्षा व्यवस्थाप्रति जनप्रतिनिधि तथा सम्बन्धित निकायले तत्काल ध्यान दिनुपर्ने आवश्यकता औँल्याएका छन्।

सरकारी सम्पत्तिको संरक्षण कसले गर्ने?

सार्वजनिक कार्यालयमा रहेका कम्प्युटर, फर्निचर, विद्युतीय उपकरण तथा अन्य सामग्री कुनै व्यक्ति वा कर्मचारीको निजी सम्पत्ति नभई नागरिकको करबाट खरिद गरिएका सार्वजनिक सम्पत्ति हुन्। यस्ता सम्पत्तिको संरक्षण गर्नु जनप्रतिनिधि, कर्मचारी र सम्बन्धित सुरक्षा निकायको साझा जिम्मेवारी हो।

न्यायिक समिति कार्यालयजस्तो संवेदनशील निकायसमेत चोरीबाट सुरक्षित रहन नसक्नुले गाउँपालिकाको संस्थागत सुरक्षा प्रणालीको समीक्षा गर्नुपर्ने आवश्यकता देखाएको छ।

अब पक्राउ परेका आरोपितमाथि कानुनी प्रक्रिया अघि बढाउनुका साथै चोरी भएका बाँकी सामग्रीको खोजी, सार्वजनिक कार्यालय तथा विद्यालयमा प्रभावकारी सुरक्षा प्रबन्ध र रातिको निगरानी व्यवस्था मिलाउनु गाउँपालिकाका लागि चुनौती बनेको छ।