भूकम्पपछिको पीडाबाट सामाजिक सेवामा समर्पित कवित कुमार नेपाली सम्मानित

काठमाडौं १८ कार्तिक

भूकम्पपछिको कठिन परिस्थितिलाई नजिकबाट अनुभूति गर्दै सामाजिक सेवालाई जीवनको उद्देश्य बनाएका दक्षिणकालीका युवा सामाजिक अभियन्ता कवित कुमार नेपाली सम्मानित भएका छन्।

दक्षिणकाली नगरपालिकाको नवनिर्मित प्रशासनिक भवन उद्घाटन समारोहका अवसरमा सम्माननीय राष्ट्रपतिको उपस्थितिमा नगरप्रमुख मोहन बस्नेत तथा उपप्रमुख बसन्ती तामाङ डंगोलले नेपालीलाई सम्मान प्रदान गरेका हुन्।

लामो समयदेखि सामाजिक सेवामा सक्रिय रहँदै आएका कवितले शिक्षा, स्वास्थ्य, कृषि, युवा उद्यमशीलता, लक्षित वर्गको हकहित, प्राकृतिक विपद् व्यवस्थापन तथा कोभिड–१९ महामारीका बेला विभिन्न सहयोगमूलक गतिविधि सञ्चालन गर्दै आएका छन्। त्यस्तै, अपाङ्गता भएका व्यक्तिहरूलाई ह्विलचेयर सहयोग गर्नेदेखि देशका विभिन्न क्षेत्रमा विपद् तथा समस्यामा परेका नागरिकलाई राहत र सहयोग उपलब्ध गराउने कार्यमा समेत उनको सक्रिय योगदान रहँदै आएको छ।

सामाजिक सेवाको क्षेत्रमा निरन्तर क्रियाशील रहेका नेपाली दक्षिणकालीलाई आफ्नो जन्मभूमि मात्र नभई कर्मभूमिका रूपमा समेत लिँदै आएका छन्। स्थानीय तहदेखि देशका विभिन्न भूभागसम्म सामाजिक सेवाको पहुँच विस्तार गर्ने उनको प्रयासले समाजमा सकारात्मक सन्देश प्रवाह गरेको छ।

नगरपालिकाको क्षेत्रमा लामो समयदेखि योगदान पुर्‍याउने व्यक्तिहरूमध्ये सबैभन्दा कम उमेरमा सम्मानित हुने युवा बनेको विषयलाई उनको व्यक्तिगत उपलब्धिका रूपमा मात्र नभई दक्षिणकालीका युवाहरूका लागि प्रेरणाको रूपमा समेत हेरिएको छ।

भूकम्पपछिको पीडा र कठिन परिस्थितिबाट सुरु भएको उनको सामाजिक सेवाको यात्रा आज सम्मानित पहिचानसम्म आइपुगेको छ। उनले प्राप्त गरेको सम्मानलाई समाजका दुःखी, असहाय तथा समस्यामा परेका नागरिकप्रतिको समर्पण र सेवाभावको कदरका रूपमा लिइएको छ।

सम्मान प्राप्त गरेसँगै सामाजिक सेवाको यात्रालाई अझ निरन्तरता दिने र समाजका निम्ति थप योगदान पुर्‍याउने जिम्मेवारी बढेको सन्देश उनको यस उपलब्धिले दिएको छ।

कवित कुमार नेपालीको यो सम्मानले पद र प्रतिष्ठाभन्दा माथि उठेर समाजको दुःखमा साथ दिने भावना नै वास्तविक सामाजिक पहिचान हो भन्ने उदाहरण प्रस्तुत गरेको छ।