सिम्रौनगढ मे एक शिक्षक के मृत्यु

बारा ०८ अगहन

बारा के सिम्रौनगढ नगरपालिका–८ कचोर्वा आधारभूत विद्यालय मे कार्यरत एक शिक्षक के शुक के दिने मृत्यु भईल बा । सिन्धुपाल्चोक घर भईल ३५ बरीस के नरेन्द्र पराजुली के निधन भईल बा । पराजुली बितल चईत से उ विद्यालय मे कार्यरत रहलन ।

शिक्षक सेवा आयोग से नाम निकालला के बाद उ विद्यालय के दरबन्दी मे रहलन । उनकर १ बेटा सिन्धुपाल्चोक मे बाडन । पराजुली मेहरारु सहित कचोर्वा मे रहत आईल रहलन ।

कुछ महिना पहिले मेहरारु वैदेशिक रोजगारी मे गईला के बाद उ अकेले कोठरी मे रहत आईल रहलन । सँझिया उनकर लास कचोर्वा नयाँ बजार मे मिलल रहे । घटनास्थल मे पुलीस के टोली पुगल बा । घटनास्थल मे डेढ महिना से आन्दोलन मे रहल शिक्षकलोग आ स्थानीय के भीड लागल बा ।

इलाका प्रहरी कार्यालय सिम्रौनगढ के प्रहरी निरीक्षक रविभूषण यादव के मुताविक शिक्षक के निधन बारे अनुसन्धान हो रहल बा । उनकर लास पोस्टमार्टम के खातिर कलैया प्रादेशिक अस्पताल पुगावेके काम हो रहल उ बतवनी ।

नगरपालिका से पाँच महिना से तलब ना मिलला से नगरपालिका विरूद्ध आन्दोलन मे रहल शिक्षकलोग घटनास्थल मे पुगल रहलन । तलब ना मिलला से शिक्षक पराजुली कुछ समय से बहुते तनाव मे रहल प्रधानाध्यापक रामायण साह बतवनी । १ सय ९५ शिक्षक बितल ४० दिन से तलब के खातिर आन्दोलन मे रहलन । दशहरा, दिपावली, छठ मे भी उलोग तलब मिलल नईखे ।

शिक्षक संघर्ष समिति के संयोजक उमाशंकर यादव के मुताविक शिक्षक पराजुली हमनी सँगे आन्दोलन मे रहलन ।