४ महिना मे थपाईल साढे ५७ अरब सार्वजनिक कर्जा

काठमाण्डु १६ अगहन

चालु आर्थिक बरीस २०८०÷८१ के पहिलका चौमासिक अवधि मे ५७ अरब ७१ करोड रोपेया से बेसी सार्वजनिक कर्जा थपाईल बा ।

सार्वजनिक कर्जा व्यवस्थापन कार्यालय के मुताविक बितल असाढ मसान्त तक मे २२ खरब ९९ अरब ३५ करोड २४ लाख रोपेया बराबर रहल सार्वजनिक कर्जा कात्तिक मसान्त तक पुगला पर २३ खरब ५७ अरब छ करोड रोपेया से बेसी भईल बा ।

कार्यालय के बितल कातिक मसान्त तक के तथ्याङ्क मुताविक अभी तक नेपाल के तिरेके बाँकी आन्तरिक कर्जा ११ खरब ८३ अरब ५७ करोड २१ लाख आ बाह्य कर्जा ११ खरब ७३ अरब ७९ करोड ६६ लाख रोपेया रहल बा ।

चालु आव के चार महिना मे सरकार आन्तरिक कर्जा के साँवाब्याज भुक्तानी मे ६५ अरब ४५ करोड ८३ लाख रोपेया आ बाह्य कर्जा के साँवाब्याज भुक्तानी मे १६ अरब १८ करोड ६१ लाख रोपेया बराबर भुक्तानी कईल देखल गईल बा ।

इहे समय के कर्जा प्राप्ति के अवस्था देखला पर सावन से कातिक मसान्त तक मे ९७ अरब ३१ करोड बराबर आन्तरिक कर्जा आ १५ अरब ८५ करोड ३० बाह्य कर्जा करके कूल एक खरब १३ अरब १६ करोड ३० लाख रोपेया कर्जा उठावल गईल बा । चालु आर्थिक बरीस के पहिलका चौमासिक अवधि मे सरकार से कईल पुँजीगत खर्च से सार्वजनिक कर्जा के साँवा आ ब्याज भुक्तानी मे कईल खर्च करिब तीन गुणा से बेसी बा ।

बितल कातिक मसान्त तक मे सरकार २९ अरब ९८ करोड ९४ लाख रोपेया पुँजीगत खर्च कईले बा । इहे समय मे सार्वजनिक कर्जा के साँवाब्याज भुक्तानी मे ८१ अरब ६४ करोड ४४ लाख रोपेया बराबर खर्च कईले बा ।