पर्सा के हुलाकी सडक मे दुर्घटना, एक के मृत्यु, एक जने घायल

वीरगंज २० चईत

पर्सा के सखुवा प्रसौनी गाँवपालिका वार्ड नम्बर ६ लखनपुर स्थित हुलाकी सडक मे मंगर के सँझिया दु गो मोटरसाईकल आपस मे ठोकईला पर भईल दुर्घटना मे एक जने के मृत्यु भईल बा आ दोसर एक जने गम्भीर घायल भईल बाडन ।

दुर्घटना मे दुनु मोटरसाइकल के चालक गम्भीर घायल भईला मे एक जने के अस्पताल लेजाएके समय रास्ता मे हि मृत्यु भईल बा ।

गण्डक नहर से उत्तर ओरी सखुवा प्रसौनी –६ अन्तर्गत के लखनपुर आ जगरनाथपुर गाँवपालिका अन्तर्गत के प्रसौनी गाँव के बिच मे रहल हुलाकी सडक मे सँझिया करिब ८ बजे दु ओरी से आ रहल ना ७ प २६०३ आ प्रदेश २– ०३ ००९ प ५३१५ नम्बर के मोटरसाइकल आपस मे ठोकईला पर भईल दुर्घटना मे परके दुनु मोटरसाइकल के चालक गम्भीर घायल भईल रहलन ।

स्थानीयबासी आ पुलीस दुनु जने घायल के उद्धार करके एम्बुलेन्स मे राखके ईलाज के खातिर वीरगंज पठईला मे उ मेसे ना ७ प ५३१५ नम्बर के मोटरसाइकल चालक पर्सा के जगरनाथपुर गाँवपालिका वार्ड नम्बर ४ सुहपुरके अन्दाजी ३० बरीस के हरिन्द्र चौधरी के मृत्यु भईल जिल्ला प्रहरी कार्यालय पर्सा के प्रवक्ता प्रहरी नायब उपरीक्षक कुमार विक्रम थापा जानकारी देहनी ।

दोसर गम्भीर घायल पर्सा के वीरगंज महानगरपालिका वार्ड नम्बर ३ छपकैया के ४२ बरीस के शेख जावेद आलम के नारायणी अस्पताल के आइसियु मे ईलाज हो रहल आ उनकर अवस्था भी सिकिस्त रहल थापा बतवनी ।

घटना के बारे मे पुलीस अनुसन्धान कर रहल प्रहरी नायब उपरीक्षक थापा जानकारी देहनी ।