मानवअधिकार संकटतर्फ पीओके : खाद्य र इन्धन अभावविरुद्ध व्यापक आन्दोलन, अन्तर्राष्ट्रिय कानुन उल्लंघनको आरोप

पीओकेमा अत्यावश्यक खाद्यान्न, इन्धन र आधारभूत सेवाको अभाव चर्किएपछि व्यापक प्रदर्शन र पूर्ण बन्दको अवस्था सिर्जना भएको छ। हजारौं नागरिक सडकमा उत्रिएपछि क्षेत्रको जनजीवन ठप्प बनेको अन्तर्राष्ट्रिय सञ्चारमाध्यमहरूले उल्लेख गरेका छन्।

प्रदर्शनकारीहरूले खाद्य सुरक्षा, सुलभ इन्धन, रोजगारी तथा आधारभूत नागरिक अधिकार सुनिश्चित गर्न माग गर्दै सरकारविरुद्ध नाराबाजी गरेका छन्। विभिन्न स्थानमा बजार, यातायात र सरकारी सेवा प्रभावित बनेका छन् भने सुरक्षा व्यवस्था कडा पारिएको बताइएको छ।

मानवअधिकारकर्मी तथा अन्तर्राष्ट्रिय विश्लेषकहरूले पीओकेमा देखिएको अवस्था “मानवीय संकट” तर्फ उन्मुख भएको टिप्पणी गरेका छन्। उनीहरूले संयुक्त राष्ट्रसंघको Universal Declaration of Human Rights (UDHR) तथा International Covenant on Economic, Social and Cultural Rights (ICESCR) अन्तर्गत नागरिकलाई खाद्य, स्वास्थ्य, आवास र सम्मानजनक जीवनको अधिकार सुनिश्चित गरिनुपर्ने दायित्व स्मरण गराएका छन्।

विश्लेषकहरूका अनुसार लामो समयदेखिको आर्थिक अस्थिरता, महँगी, बेरोजगारी तथा आपूर्ति व्यवस्थाको कमजोरीका कारण जनआक्रोश विस्फोटको अवस्थामा पुगेको हो। पछिल्लो आन्दोलनले पाकिस्तानको गहिरिँदो आर्थिक तथा प्रशासनिक संकटलाई अन्तर्राष्ट्रिय स्तरमै उजागर गरेको बताइएको छ।

यसबीच, विभिन्न मानवअधिकार संस्थाहरूले प्रदर्शनकारीमाथि बल प्रयोग नगर्न र नागरिकको अभिव्यक्ति स्वतन्त्रताको सम्मान गर्न आग्रह गरेका छन्।