बारा के कोरोना संक्रमित जनानी के वीरगंज मे मृत्यु
बारा २२ अगहन
बारा के एक जने कोरोना संक्रमित जनानी के वीरगंज मे मृत्यु भईल बा । बारा के जितपुरसिमरा उपमहानगरपालिका–४ औराह रहेवाला ७१ बरीस के धनकुमारी सुनुवार के मृत्यु भईल बा ।
अगहन १४ गते दम के समस्या अईला के बाद उनका के वीरगंज स्थित बयोधा अस्पताल मे लेगईल रहे । बयोधा मे स्वाब संकलन करके अगहन १६ गते पीसीआर टेष्ट कईला पर रिपोर्ट पोजेटिभ आईल रहे । ओकरा बाद उनका के नेसनल मेडिकल से सञ्चालन कईल बाबा होटल के आइसोलेसन मे राखल गईल रहे । सोमार के सबेरे पौने ६ बजे ईलाज के समय मे मृत्यु भईल आइसोलेसन के डाक्टर ओमप्रकाश जानकारी देहनी ।
‘घुमफिर करे ना सकेके समस्या सँगे किड्नी आ हाइपरटेन्सन भी रहे,’ कहत उ, ‘आइसोलेसन मे अईला पर कोभिड निमोनिया भी रहे । आईसीयू मे राख के ईलाज करत रहनी । ४ दिन भेन्टिलेटर मे भी राखल गईल । जेतना कोशिस कईला पर भी बचावे ना सकल गईल ।’
बाबा आइसोलेसन मे ५ जने गम्भीर अवस्था के संक्रमित बाडन । जउना मेसे २ जने के भेन्टिलेटर मे राखल डाक्टर ओमप्रकाश जानकारी देहनी ।
