हुण्डी कारोबार मे संलग्न ४ जने पकडईलें

वीरगंज ०२ चईत

वीरगंज मे हुण्डी के कारोबार मे संलग्न रहल आरोप मे पर्सा पुलीस एक युवती सहित चार जने के पकडले बा ।

पकडाएवाला मे वीरगंज महानगरपालिका–१० के ३२ बरीस के कुनाल जयसवाल, वार्ड नम्बर २२ के ३९ बरीस के वीरेन्द्र साह तेली, २० बरीस के रेखा कुमारी साह आ पर्सा के जगरनाथपुर गाँवपालिका–६ के २५ बरीस के मितु कुमार कुर्मी रहल बाडन ।

पर्सा के प्रहरी उपरीक्षक कुमोद ढुंगेल के मुताविक वीरगंज–१० आदर्शनगरस्थित कुनाल जयसवाल के किराना दोकान से उलोग के पुलीस बियफे के दिने पकडले रहे ।

जयसवाल के किराना दोकान से पुलीस नगद चार लाख तीन हजार नेपाली रोपेया, अनेकन बैंक के चेकबुक १३ थान, अनेकन मिति मे काटल चेक ६६ थान, नबिल बैंक, एनआइसी एसिया आ नेपाल राष्ट्र बैंक मे करके ३१ लाख से बेसी रोपेया जम्मा कईल डिपोजिट स्लीप पाँच थान, एटीएम कार्ड तीन थान आ मोबाइल फोन सात थान बरामद कईल प्रहरी उपरीक्षक ढुंगेल जानकारी देहनी ।

पकडाईललोग विरुद्ध बैंक तथा वित्तीय संस्था सम्बन्धी ऐन २०७३ विरुद्ध के कसुर मे मुद्दा दर्ता करके पर्सा जिल्ला अदालत से पाँच दिन के म्याद अनुमति लेके अनुसन्धान हो रहल ढुंगेल जानकारी देहनी ।