भाषणमा नेपाली रोजगारी, उद्योगमा विदेशी प्राथमिकता ? अनिल रुंगटामाथि दोहोरो नीतिको गम्भीर आरोप

वीरगंज, २२ माघ

पर्सा क्षेत्र नम्बर–१ का नेपाली कांग्रेस उम्मेदवार अनिल रुंगटामाथि चुनावी भाषण र व्यवहारबीच ठूलो अन्तर रहेको आरोप सार्वजनिक भएको छ। चुनावी घरदैलोका क्रममा नेपाली युवालाई रोजगारी दिने प्रतिबद्धता जनाउँदै आएका रुंगटामाथि आफ्नै उद्योगहरूमा नेपालीभन्दा भारतीय कामदारलाई प्राथमिकता दिएको दाबी गरिएको छ।

स्थानीय स्रोत र श्रम कार्यालयसम्बद्ध व्यक्तिहरूको भनाइ उद्धृत गर्दै केही पक्षले रुंगटाको स्वामित्वमा रहेको माँ दुर्गा फुड उद्योग र जग शक्ति स्टिल उद्योग मा अधिकांश मजदुर भारतीय रहेको आरोप लगाएका छन्। यद्यपि, यस विषयमा उम्मेदवार रुंगटा वा सम्बन्धित उद्योगको आधिकारिक धारणा सार्वजनिक भइसकेको छैन।

स्थानीय युवाहरूले आफूहरू काम खोज्दै उद्योग पुगे पनि अवसर नपाएको गुनासो गरेका छन्। उनीहरूको भनाइ अनुसार नेपाली कामदारलाई अस्थायी काम र न्यून ज्याला दिइने, जबकि भारतीय कामदारलाई स्थायी प्राथमिकता दिइने गरेको आरोप छ। यस्ता दाबीहरूबारे स्वतन्त्र पुष्टि भने हुन बाँकी रहेको बताइन्छ।

चुनावी भाषणमा “नेपाली युवालाई स्वदेशमै रोजगारी” भन्ने नारा उठाउँदै आएका उम्मेदवारमाथि उठेका यी आरोपले पर्सा क्षेत्र–१ मा राजनीतिक बहस तातेको छ। आलोचकहरूले यसलाई दोहोरो चरित्रको उदाहरण भन्दै प्रश्न उठाएका छन्—रोजगारीको प्रतिबद्धता भाषणमै सीमित हो कि व्यवहारमै लागू हुन्छ ?

यसैबीच, समर्थकहरूले भने आरोपहरूलाई राजनीतिक रूपमा प्रेरित भन्दै अस्वीकार गरेका छन्। आगामी निर्वाचन नजिकिँदै जाँदा रोजगारी र युवा पलायनको मुद्दा पर्सा क्षेत्र–१ का मतदाताबीच प्रमुख बहसको विषय बनेको छ।

अब मतदाताले भाषण र व्यवहारबीचको अन्तर मूल्यांकन गर्दै निर्णय गर्ने समय आएको राजनीतिक विश्लेषकहरूको भनाइ छ।