राजविराजमा पुष्पअर्पण कार्यक्रम, योगदान स्मरण गर्दै भावनात्मक वातावरण

राजविराज १६ माघ

मधेस प्रदेशको सप्तरी जिल्ला तिलाठी कोइलाडी गाउँपालिका–७ निवासी तथा विष्णुपुर गाउँपालिकामा एकाउन्टेन्टका रूपमा कार्यरत राधेश्याम यादवका बुवा कर्मचारी सहिद प्रभु नारायण यादव को स्मृतिमा आयोजित श्रद्धाञ्जली कार्यक्रममा गहिरो शोक र भावुकताको वातावरण देखिएको छ।

राजविराज नगरपालिका अन्तर्गत जिल्ला समन्वय समितिको परिसरमा अवस्थित सहिद प्रभु नारायण यादवको शालिकामा पुष्पमाला अर्पण गर्दै श्रद्धाञ्जली व्यक्त गरिएको उक्त कार्यक्रममा मधेस प्रदेश सरकारका मन्त्री महेश यादव, क्षेत्र नं.–२ का जसपा नेपाल उम्मेदवार उमेश यादव, जिल्ला समन्वय समितिका वर्तमान तथा पूर्व अध्यक्ष, छिन्नमस्ता गाउँपालिकाका अध्यक्ष विध्यानन्द चौधरी, विभिन्न कर्मचारी संघ–संस्थाका प्रतिनिधि, राजनीतिक दलका नेता, सञ्चारकर्मी तथा सर्वसाधारणको उल्लेखनीय उपस्थिति रहेको थियो।

कर्तव्यनिष्ठ कर्मचारीदेखि सहिदको अमर पहिचानसम्म स्वर्गीय प्रभु नारायण यादव एक इमानदार, कर्तव्यनिष्ठ र जनसेवाप्रति समर्पित कर्मचारीका रूपमा परिचित हुनुहुन्थ्यो। सार्वजनिक सेवामा रहँदा उहाँले देखाउनुभएको निष्ठा, सत्यनिष्ठा र जिम्मेवारीबोध आज पनि कर्मचारी जगतका लागि प्रेरणाको स्रोत बनेको सहभागी वक्ताहरूले उल्लेख गरे।

व्यक्तिगत स्वार्थभन्दा माथि उठेर समाज र राज्यप्रति समर्पित रहँदा उहाँ सहिदको रूपमा इतिहासमा अमर बनेको उनीहरूको भनाइ थियो। उहाँको जीवन सादगी, संघर्ष र सेवाभावले भरिएको रहेको उल्लेख गर्दै आजको पुस्ताले उहाँका मूल्य र आदर्शलाई अनुसरण गर्नुपर्नेमा जोड दिइयो।

सहिदहरू कहिल्यै मर्दैनन्

कार्यक्रममा वक्ताहरूले सहिद प्रभु नारायण यादवको योगदानको स्मरण गर्दै भने,

“सहिदहरू कहिल्यै मर्दैनन्, उनीहरू विचार र प्रेरणाका रूपमा सधैं जीवित रहन्छन्।”

शालिकामा पुष्प अर्पण गर्ने क्रममा धेरै सहभागीको आँखामा आँसु देखिन्थ्यो। सहिदको सम्झनाले कार्यक्रमस्थल गम्भीर र करुण बनेको थियो। सहभागीहरूले परिवारजनप्रति गहिरो समवेदना प्रकट गर्दै सहिदको सपना र मूल्यलाई जगेर्ना गर्न सबै एकजुट हुनुपर्ने आवश्यकता औंल्याए।भावी पुस्ताका लागि प्रेरणाको स्रोतवक्ताहरूका अनुसार सहिद प्रभु नारायण यादवको जीवन र बलिदान मधेस मात्र होइन, सम्पूर्ण देशका लागि प्रेरणादायी छ। उहाँको नाममा स्थापित शालिका केवल ढुंगाको संरचना नभई न्याय, इमानदारी र जनसेवाको प्रतीक भएको उल्लेख गरियो।

कार्यक्रम श्रद्धाञ्जली मन्तव्य, मौनधारण तथा पुष्पअर्पणसँगै सम्पन्न भयो। सहिद प्रभु नारायण यादवप्रतिको सम्मान, माया र कृतज्ञताले भरिएको उक्त कार्यक्रममा सहभागी सबै भावुक बनेका थिए।